Ne lazim e ku meriv navekî li weşana TRT 6 bike.

Belkî jî navek an jî etîketeke wekî ‘xayîn-qehreman’ jê re ne lazim e.

Bi vê weşanê re helbet AKP heta demeke din jî dê nêçiriya kurdên xwe-ne-nas bike, lê weşana bi kurdî wekî biratiya ‘dew û mast’î dê bi wext re doza kurd û kurdistanê xurtir bike. Jixwe ev weşan jî ji encama keda doza kurd derketiye.

Ji ber ‘resmî’bûna meselê divê kurd di du hêlan de hişyar bin:

1- Bi vê sînerjiya weşana TRT 6ê re divê civaka kurd hay ji xwe hebe ku ji piştkurmitiya dewleta kemalîst re nebe pîneyeke erzan.

2- Bi vê weşana ‘resmî’ re divê kurd zorê bidin dewletê da ku berê Kurdî firehtir bibe û bikeve nava qanûnên resmî.

Weşana TRT 6 helbet di jiyana siyasî, civakî û rewşenbîrî de dê bi xwe ve gelek rê û rêçikên nû jî veke.

Ji aliyekî ve dê hebûna kurdî bi awayeke ‘resmî’ xwe ji zindana zimanê tirkî rizgar bike; lê ji hêla din ve jî dê hişê zimanê kurdî yê bakur bivênevê bikeve nava zindana sînorên Mîsak-î Mîlî yê Tirkiyê.

Ji aliyekî ve hişê neteweya kurd ya ku ji medyaya kurdî diherike dê bêtir xurtir û seferber bibe; lê li aliyê din jî hişê ku dê ji TRT 6 biherike dê bi xwe ve girseyên a-polîtîk biafrîne; jixwe hedefa dewleta veşartî jî hemû ev e.

Ji aliyekî ve dê peyv û awazên kurdî li ser text û awazên ‘resmî’ xwe bipîvin, birîna xwe bikewînin û bi ser xwe ve werin; lê li milê din ve jî dê di bin awirên gefxwur de ji dîwana kemalîstan re bibin pîneyek.

Ji aliyekî ve dê kurdistanîbûna Roj Tv û Kurdistan Tv bêtir derkeve pêş; lê li aliyê din jî dê partiyên dewletê bi xêra vê weşanê heta demeke din jî li ber deriyên kurdan dê afirên nû çêkin bo ku tirkmancên me tê de bizirên.

Ji aliyekî ve dê riya bazar û reqabeta kurdî vebe, lê li hêla din jî dê tirkên dinyanedîtî vê yekê wekî mineta bavê xwe li rûyê me bidin. (Tu dibêjî qey TRT bi tenê li ser baca van tirkan dijî!!!)

Ji aliyekî ve dê rol û hebûna serhildanên kurdan bêtir bête çespandin; lê li milê din jî dê riya serhildanên nû mixabin ‘ko’ bike. (Di bernameyeka TRT 6 de, li ser pirsekê, zarokekî kurd bi kurdî wiha bersivand, “Ez dixwazim bibim polîs!”)

Ji aliyekî ve dê koletiya zimanê kurdî bişkê; lê li milê din jî dê xulamtiya kurdî ya resmî dest pê bike.

Welhasil kelam, heta ku Hejar karî ji van kemalîstan re bêje ‘ŞEŞ’ mixabin bi hezaran xuşk û birayên xwe kir qurban. (Fîlmê bi navê “Zilamê Mezin, Evîna Biçûk” bînin bîra xwe!!!)

Helbet meriv dikare xalên jor ji hev veçirîne û vê nivîsê dirêjtir jî bike, lê ne lazim e ku meriv neheqiyê li hişê xwendevanan jî bike.

We nivîseke pir cîdî xwest, aha ji we re ezbenî!