NAVENDA NÛÇEYAN – PENa Swêdê ji bo balê bikşîne ser mafên nivîskaran dest bi kampanyayê kir û ev kampanya dê heta salekê ango pîrozbahiya sedsala PENa Swêdê bidome.

Kampanyaya ku PENa Swêdê ji bo balê bikşîne ser mafên nivîskaran dest pê kiribû didome. Di çarçoveya kampanyayê de di destpêkê de PENa Swêdê bal kişand ser Nivîskar Osman Kavala yê niha girtiye. Ev kampanya dê heta meha îlona 2022’yan ango heta pîrozbahiya sedsala PENa Swêdê bidome. Dê gelek pirtûkxaneyên li Swêdê jî beşdarî kampanyayê bibin. Dê çalakî jî bên lidarxistin.

Her wiha Serokê PENa Navneteweyî Bûrhan Sonmez jî bi nivîsekê banga piştevaniyê ji bo Nivîskar Osman Kavala kir.

Serokê PENa Navneteweyî Burhan Sonmez derbarê Osman Kavala de wiha got:

“Ger hûn li Tirkiyeyê ji kesekî bipirsin, dê bibêjin ku di çalakiyekê de Osman Kavala nas kiriye. Ji ber ku ew li her derê bû. Dema ku ez yanzdeh sal berê vegeriyam Tirkiyeyê, ez ketim nav Konseya Aştiyê ya ku ji bo çareseriya aştiyane ya pirsgirêka Kurd dixebite. Min li wir Osman Kavala nas kir, ez bûm şahidê dilovanî û nêzîkatiya wî ya erênî ya ji bo çareserkirina pirsgirêkan. Cara dawîn ku min ew dît, mixabin, di odeyeke girtîgehê de bû. Dema ez diçûm serdana wî, dema min jê dipirsî ka di girtîgehê de rewşa wî çawa ye, wî bal dikşand ser derve û digot:”Ya girîngtir, rewşa derve çawa ye.” û li hevalên xwe dipirsî. Ev çar sal in di girtîgehê de ye. Ew roj û salan nahesibîne, lê pirtûkan dihejmêre. Di hucreya wî de ji panzdeh pirtûkan zêdetir hebe qedexe ye, ew dixwaze ku bêhtir hebin.

Bi çendîn biryarên dadgehê hatiye azadkirin, lê heman roj beriya ku ji girtîgehê derkeve, biryarên nû yên dadgehê ji bo girtina wî hatine çêkirin. Dadgeha Mafên Mirovan a Ewropayê (DMME) û Konseya Ewropayê diyar kirin ku girtina Kavala di gelek biryarên wan de ne rewa ye û xwestin demildest bê berdan. Di dawiyê de, Komîteya Wezîrên Konseya Ewropayê heta 30ê Îlona 2021ê muhlet da Tirkiyeyê, lê rayedarên Tirkiyeyê nîşan dan ku ew hiqûqa navneteweyî û her wiha yasaya navxweyî nas nakin.

Kavala di nameyekê de ji rojnamevanekî re dibêje: “Ez ê li dengê baranê guhdarî bikim û li benda dîtina keskesorê bimînim ku ji me re dibêje jiyan çi mûcîze ye. Em ji bo Kavala dixebitin ku di zûtirîn demê de wê keskesorê bibîne; ji ber ku keskesor li seranserê cîhanê li benda gelek nivîskar, rewşenbîr û parêzvanên mafên mirovan e. “

Ji ser vê lînka jêr hûn dikarin xwe bigihêjin hûrguluyê kampanyayê:

https://www.svenskapen.se/senaste-nytt/2021/10/26/tolv-tystade-rster-osman-kavala-frst-ut-i-svenska-pens-nya-kampanj