NAVENDA NÛÇEYAN – Rojnameger Nûrcan Yalçin hat binçavkirin. Derbarê binçavkirina Nûrcanê de Koalîsyona Jinê ya di Rojnamegeriyê de daxuyanî da û da zanîn ku hemleyên li dijî çapemenî û azadiya îfadeyê nayên qebûlkirin.

Serê sibehê polîsan bi ser mala rojnameger Nurcan Yalçin de girtin. Di serdagirtina malê de Nurcan hat binçavkirin.

Nurcanê birin Şaxa TEM’ê ya Amedê û sedema binçavkirinê nehat zanîn. Her wiha derbarê hevdîtina parêzer de jî qedexeya 24 seatan hat dayîn.

Berê jî li 9’emîn Dadgeha Cezayê Giran a Amedê salek û 6 meh û 20 roj bi iddiaya ku “propagandaya rêxistinê kiriye” û 2 sal û mehek jî bi îdiaya ku “endama rêxistinê ye û bi zanatî alîkariya rêxistinê kiriye” li ser hev 3 sal û 7 meh û 22 roj cezayê girtîgehê li Nûrcanê hatibû birîn.

Îro Koalîsyona Jinê ya di Rojnamegeriyê de (CFWIJ), bi daxuyaniya ku da bertek nîşanî binçavkirina rojnameger Nûrcan Yalçin a li mala xwe ya Amedê hat binçavkirin da.

CFWIJ’ê da zanîn ku zext û operasyonên çewisandinê yên li dijî rojnamegeran ên li Tirkiyeyê bi fikar in û got hemleyên li dijî çapemenî û azadiya îfadeyê nayên qebûlkirin.